俾個機會你sell杜拜富豪

#跑數狗實戰經驗

之前分享過，對住大富豪，有時候人品比產品更加重要，但呢句嘢絕對唔係金科玉律，學識分幾時、邊樣嘢重要絕對可以幫你更快步向成功。

先問你一個問題，你有冇諗過杜拜嘅富豪會想買乜嘢投資產品？

話說跑數狗嘅老友，早排飛咗去杜拜嗰度傾生意同埋順便見識。試想像下你係佢，去到杜拜，見到當地富豪，想sell佢買投資產品，你首先諗到嘅係要提及隻產品嘅邊一個特色?

投資回報？風險管理？分散投資定係穩健定還是其他？

一般香港用sell儲蓄單做例子，可能會比較回報、透明度高又或者穩健等等，呢樣都係好多香港Agent覺得好驕傲嘅特色之一。咁我老友都係咁sell，點知杜拜富豪用一個尖銳嘅問題車埋嚟，就問到我兄弟口啞啞。

當時佢第一樣嘢問嘅就係:呢啲投資產品嘅分紅回報到底有冇監管?

之前有同大家update過一篇有關披露紅利分成率嘅文章，入邊都有提到紅利回報，係有分保證同埋非保證。而杜拜嘅富豪所關注嘅就係，如果保險公司真係派唔足呢一啲紅利其實有冇監管呢? 雖然我老友都兜話，保險公司都會有自我監管…又講過往嘅紀錄都好好。

杜拜富豪又再問，咁有冇試過真係派得少呢?

我老友又再一次啞咗…

先講返產品，其實同類型風險嘅產品，回報差異真係不大，可能都係within 零點幾厘至一厘。呢一點富豪們都好清楚，而香港嘅紅利分成率好似好透明，但實質呢種產品結構對杜拜富豪嚟講，就等於產品嘅投放金額又高，但回報又唔算高，而且不確定性，就要買家承擔哂，所以佢哋好少會比回報所吸引，反而更專注嘅係產品嘅透明度高唔高。

所以西方富豪，會更鐘意買一種叫做IUL嘅產品（investment universial life )，呢種產品香港暫時冇，所以我諗有7成以上嘅香港agent唔認識。

呢種產品嘅特性係儲蓄單嘅一種，但就同納指等等嘅外國股票指數掛勾，靈活性高，透明度亦極高。可能你會話，咁樣風險咪仲高?冇錯，但外國嘅富豪比起風險，更著重透明度，寧願咁都好過將重注壓哂係保險公司身上。IUL暫時喺新加坡同埋百慕達比較流行。以叔叔所知，唔少國內富豪，又或者少部分香港broker，都有幫新加坡買呢類型嘅IUL產品，金額達幾百萬至過千萬美金不等。

至於好似Term Life呢種保費低、槓桿大嘅單，雖然唔洗儲住舊錢係度，但外國富豪認為產品有歲數限制，保障唔夠長遠，所以亦唔太受歡迎。

而由於文化嘅差異性，一般亞洲富豪都係鍾意保守一啲嘅投資產品，買得保險公司嘅產品就係想穩健，唔太願意去承受過多嘅風險。所以IUL即使香港有得賣，一開始可能都唔會太受落。

咁可能你會話，香港而家都冇得賣，啲富豪又唔會buy，咁你講嚟做乜。但成日都同大家講，唔好等機會嚟到嘅時候先至準備，而係你要做好準備隨時迎接機會。

好多人無論係做生意定係做銷售，都好局限喺自己嘅能力圈，又或者係自己做開做熟嘅嘢。冇人預知到機會幾時來臨，認真，與其只諗住點樣追MDRT，以為追到就等於一切，無時無刻學習更多、見識更多先係最重要！