做保險衰過狗？

#跑數狗secret

如果話呢行有咩係人人必經嘅「歷練」，咁一定係俾人罰錢！慎防有啲行外嘅狗仔粉唔知，解釋一下！保險好興「罰錢」呢個風氣，一般用嚟防止遲到、No Show等，講白啲，就係為咗迫人返工。好多人投身呢行前，上線/ Leader都會同你講做呢行等於做自己老闆，但入行後就會發現都係要日日返Office，開會又好，打牙骹都好，總之都係要你返公司，唔返/遲到就罰錢，唔係罰一百幾十咁少，好多公司都罰幾百起跳，所以都幾甘！

但點解要迫人返公司呢？即係做自己老闆呢樣嘢係呃人? 其實又唔係，如果你真係一個完全做到自律，每日可以定時起身，開工約客，每月定量簽到單，仲開拓到新客源等等，當然就最好。但問題係呢行8/9成嘅人都唔屬於呢種「自律型」嘅老闆，而係充滿惰性同拖延癌，好多時跑到數，都係俾人迫出嚟。所以為咗令Agent們Keep住生產力，就唔理好醜，的咗你返嚟Office做吓嘢開會再算。為咗對準時嘅同事公平啲，維持好啲嘅團體氣氛，「罰錢」呢個工具就應運而生了。

不過呢個制度都會搞到好多時啲會為開而開，為返工而返工，返到去又冇咩實際嘢做，如果真係好自律搏命嘅Agent仲可能會好燥底，覺得浪費時間。而真係天性爛訓、成日遲到嘅人更加受到荷包硬性傷害，錢都未搵到就袋錢返工，都會累積唔少怨氣。

另一個弊病就係啲罰款去向！跑數狗見過唔少團隊罰錢個Pool好大，一個月有幾萬蚊數，都唔少錢！咁呢堆錢又何去何從呢? 跑數狗就知道紅色公司有位DD試過話用呢筆公費嚟幫團隊請個行政助理，幫大家處理一啲日常雜務咁，聽落好似都幾唔錯，但其實呢位DD出面都有生意，呢個行政助理有9成時間都係幫DD做緊自己嘢！呢個例子都唔係少數，好多DD都會公器私用，仲有啲DD出去見完自己啲客，都會留返張單Claim公數，話係幫大家見咗啲重要嘅人脈，遲吓幫到大家咁話。當然有啲Agent挑通眼眉唔信啦，但係呢筆罰款又冇人監管，DD嘅理由又講到咁好聽，結果只有死頂，唯有盡量唔好遲到俾人罰。

但跑數狗亦見過有啲團隊就有完善咁管理呢筆罰款，每個月有得睇番邊個被罰，個Pool有幾多錢、搞活動、請人幫手做Recruit又用咗幾多錢。筆錢最後都真係用返喺團隊身上。所以被罰嘅都心甘情願，遲到嘅情況都真係有改善！其實呢個罰錢制度立意都係好嘅，但點樣運作，點樣好好運用罰款，就真係考驗人性!